以平為大前提,hostel係我地唯一嘅選擇。喺澳洲如果係黎旅行嘅話,俾貴少少住酒店就無所謂,但如果係黎working holiday,慳得一蚊得一蚊,尤其是係初初到埗未有收入嘅時候。不過以hostel黎講,價錢都唔係特別平,一晚為返起港紙都差唔多要$200幾一個人,我地重要係住6人房(我地好驚死,揀咗女生房)。我地只係book咗一個星期,哩一個星期我地要搞晒戶口、電話、稅號,最緊要係塭到地方住。普遍我地兩個人肯俾貴少少每星期大約400澳紙就可以租到有兩間房嘅屋,點都平過住喺hostel。
我自己本身就未住過hostel,每次去旅行最多都係喺airbnb塭民宿住。朋友就成日慣常自己一個去旅行(其實我好羨慕,不過有人陪我一齊去都係另一種幸福黎嘅🙊),多數住hostel,不過都係去啲亞洲國家,佢同我講無問題,好安全嘅。直到我地到達hostel嗰一刻,我地兩個都依然天真咁相信唔會有事發生嘅。
第一日到hostel係大約朝早9點幾,我地6點幾到機場,搭Skybus出市區,到總站好好彩重有shuttle bus直到hostel。我地入到房只係見有兩個人喺度瞓緊,入面有3張碌架床,哩兩個人分別瞓喺第一同第三張嘅上層,佢地分別床嘅下層都堆滿晒雜物,而且用毛巾圍住,根本睇唔到入面。我地重喺度講:「咁衰嘅,霸埋人地下面嗰層放雜物都有嘅😒。」我地好自然就住咗喺中間嗰張碌架床。
第二日,我地見嗰兩個backpackers check out咗,下層依然堆滿咗雜物。直到哩一刻,我地先知原來哩兩個下層都有人住🙄。究竟之前嗰晚有幾多個人喺房,到宜家都係一個謎,上層位置接二連三有人黎住有人走,但下層住嘅人依然無變,直到我地走都係。佢地好似係長住喺度,直到我地喺度住嘅第三至四日,我地先見到佢地嘅真面目😱。
重有一樣野唔習慣嘅就係我地同佢地嘅作息時間唔同。有一晚我地11點返入房唔知有無人好自然咁開咗燈,就俾其中一個(似乎長住嘅)roommate叫我地熄返盞燈。我地入到去又唔講得野,此後嗰幾日我地食完飯、沖完涼都會走返落去個public kitchen度坐,直到差唔多瞓先返上去,有種有家歸不得嘅感覺😅。
哩樣都唔係最大問題,直到尾二嗰晚,最爆嘅事情發生咗。當日上層又換咗roommate,喺下午返房嘅時候已經見過面。係一個由London黎做working holiday嘅女仔,傾咗幾句已經覺得佢好主動好熱情。嗰晚我11點幾落咗地下public area收wifi,我個fd就留喺房摸黑禁電話打機。喺樓下嘅我,突然收到我個fd嘅whatsapp話見到有兩個人爬咗上同一張床,但因為太黑睇唔到係男定係女,我地當下嘅反應:「唔係呀嘛!?」個fd好似睇緊(呃...佢話無睇,扮瞓...但係聽到......)真人show咁。本身聽到啲啜啜聲,重有聽到把男人聲問:「Are you ready?」,繼而就....都唔駛講落去啦。我問駛唔駛救佢,所以我膽粗粗衝咗上去開門啪著咗粒燈制即刻逃走。點知事後聽個fd講就喺著燈嗰下見到個女仔無著衫坐喺個男人上面,com返張被繼續....成件事真係好變態。可能你會問點解佢地可以咁安心咁做?因為佢下層無人....而且間房得我個fd同另一個roommate。又或者其實佢可能無介意過。
到我返上去嗰陣,唔知哪來嘅勇氣,我入一入房,轉過頭就走返落去reception同個staff講,因為女生房其實係唔俾男人入去。個Security Guard跟住我上咗去,我話不如我轉頭先入返去,點知佢唔俾😂。佢隨即趕咗個男人出去。成件事完咗,我真係好_驚,好驚俾人夜晚報復😂。之後淨返喺hostel嘅時間,夜晚我留喺房嘅時候又驚瞓緊嗰陣俾人謀殺,唔喺房嗰陣又驚啲行李俾人偷晒😵。好彩最後都平平安安度過咗。
我地得出咗一個結論:外國嘅hostel真係唔可以亂咁入去住,除非你有足夠嘅心理準備。如果無視死如歸嘅心情,我勸你千萬唔好揀hostel。(事後我地睇過,喺附近book酒店住兩個人都係每人俾多幾十蚊港紙🙄。)
到咗哩一刻,我地依然心有餘悸。
沒有留言:
張貼留言