前篇...新加坡Part 4:玩轉Universal Studios

黎到新加坡,其實我地最期待莫過於去環球影城。
不過其實我個膽好細,刺激少少已經承受唔住🙄。

搭到去Harbourfront再沿住海邊行過去Universal Studios, 大約行15-20分鐘就到。Universal Studios 出面有個馬來西亞美食街,可以食完野再入去或者中途出返黎食晏再返去玩都得。當日我地就喺美食街解決左早餐同午餐。

沿住海邊行大約20分鐘

美食街入口

填飽肚就入去玩,梗係要喺門口影返張。

有好多minions,好彩唔係我最愛,如果唔係實發癲😂。鍾意minions嘅人黎到一定超興奮。

小丑出現,完全表現到嗰種衰衰格格嘅行為。我地睇緊地圖,佢突然走埋黎問有無野幫到我地,我話我地未有目的地,佢一野搶咗份地圖揸皺佢掉咗😂。之後有個女仔塭佢影相,佢係都要人坐喺佢大脾,重要作狀錫人地😅。

Transformer真係好有型😍

 Transformer經過咗未玩,見好多人排隊。之後晏啲返黎玩唔駛排,重要連續玩咗2次😂。哩個機動遊戲係超正嘅4D。不過個人認為唔夠大阪環球影城嘅Harry Potter刺激,4D嘅離心力係我難得接受到嘅程度,4D反而無乜離心力就唔夠好玩。

行行下就已經去到埃及區。入面有個室內過山車,聽聞好恐怖,我真係無膽試😵。

史力加主題區。

史力加4D探險唔錯,不過入去睇之前要睇咗段片先,可能會有啲悶,但都值得一玩。

其實係吊起嘅過山車,我知哩個唔係太刺激,但原諒我心血少,都玩到we嘩鬼叫😂,完全俾人鄙視😅。

其實新加坡環球影城唔係好大。我地足足喺入面行咗3個圈,可以慢慢咁行下玩下影下相,到6點閂門先走。

晚餐試埋另一間肉骨茶--松發。不過個人認為松發太過商業化,咩都有得俾你買走。感覺味道好似好味精,比起發起人無咁真材實料。個人鍾意發起人多啲。