到埗後即做三件事

喺澳洲到埗之後,有幾樣野係第一時間一定要做嘅。

第一、申請電話號碼

我地唔知邊間平邊間好用,隨便就揀咗Vodafone。後來聽朋友講話其實Telstra網絡係覆蓋得最全面。我地嗰個係Prepaid,唔駛簽約,所以其實你之後話轉就轉都無問題。申請嘅時候,未有一個穩定嘅通訊地址都無問題,俾酒店或者hostel 地址佢都可以。申請嘅過程中,一定要我地先俾一個付款嘅資料,由於未有銀行戶口,俾信用卡佢都可以。哩個付款資料只係暫時性,唔會咁快扣數,到有銀行戶口嘅時候,就可以將付款資料轉返自動喺戶口扣,佢扣之前重會有訊息同email提你,所以唔駛太擔心。最方便嘅係哩樣野可以喺佢個apps改到,不過其實我就話好唔穩陣,入咗銀行戶口號碼資料之後,乜野security嘅野都無,又唔駛乜野授權呀,乜野認證呀,到宜家我都係覺得好危險🙄。搞掂晒之後,張電話卡即刻俾埋你,跟手就可以用啦。

第二、申請銀行帳號

有咗電話號碼之後,就可以去申請銀行戶口。
又係隨便揀一間,去左nab度開。第一日去,行咗兩間都開唔到。第一間話佢teller得兩個,唔夠人手直接拒絕咗我地,第兩間都係以同樣理由話開唔到住🌚,要我地預約之後嗰日朝早過黎。對於佢地嘅做法,我地真係好驚訝。你試諗下,如果喺香港,根本無人夠膽直接拒絕個客,就算真係咁做,都一定俾人鬧爆。帶住驚訝而無奈心情嘅我地唯有死死地氣等到第2日先去開。
開戶口嗰陣只要帶passport、身份證、working holiday visa hard copy (最好過黎澳洲之前印定一份),同埋提供到暫時嘅住址 (Hostel或者Hotel) 俾佢就得。幫我開戶口嗰位teller哥哥識講廣東話,幫我地主要開咗三個戶口。佢地最大嘅好處都係唔會有月費或者最底存款要求。

1.Classic
哩個係最基本嘅戶口,有提款卡,純粹用作提存服務,你啲錢要係放咗喺哩個戶口先可以拎到錢呀,又或者喺買野嗰陣用paywave付款。哩個戶口無記錯嘅話應該係無利息嘅,所以我都係將啲錢放喺另外兩種戶口,到時用幾多就撥返幾多落去哩一個提款卡戶口。

另外嗰兩款就純儲錢嘅,分別係Reward Saver 同 iSaver,逐日計息每月月底派息。

2. Reward Saver
哩種戶口最高年利率有成2.7%。不過大前提係佢期望你放咗錢落去同一個月係唔會拎返出黎。如果同一個月你放咗錢落去,成個月都無支出,嗰一個月就會有2.7%p.a嘅利息。但係如果你哩一個月存咗錢之後曾經支出過,就只會得返 variable basic interest rate 0.5%p.a嘅利息。重有就係你每一個月都要有存錢,最高年利率先會生效。所以對於未有收入嘅我,暫時都未用到哩個戶口🙄。

3. iSaver
哩種戶口好就好在有利息之餘,每個月都可以正常咁提存,所以我自己就大部分錢都放喺哩度滾存利息,用嗰陣就逐少逐少撥去提款卡戶口。雖然年利率低少少,但都好過無,幾蚊都係錢黎架嘛。頭4個月有額外0.7%p.a.,即係最高有1.9%p.a.,之後就得返1.2%p.a.。點都高過香港嘅銀行活期好多。而且只要登記咗網上理財,戶口間撥數就好方便,喺手機apps都做到。

喺澳洲開戶口嘅程序超簡單,簡單到我有啲驚,完全一個簽名都唔駛。開完之後就直接可以存錢落戶口,咁就唔駛擔心成日帶住啲現金出去。

有一件事我地唔係好滿意嘅就係明明佢同我地講話安排返我地落去哩間分行拎卡,重話一個禮拜就有。我地之後搬離咗喺City嘅Hostel,過咗一個禮拜特登搭返車出City拎卡嘅時候佢竟然同我地講話寄咗俾我地。好彩嘅係返Hostel問佢有keep起啲信先拎得返張卡,但其實Hostel嘅職員都唔理你拎嘅信係邊個,真係好唔安全。拎到卡見話密碼都係寄,但Hostel嘅信唔見有,睇怕都係未寄到。再去nab問,佢就即時幫我地reset返個密碼即刻去出面嘅櫃員機度改,中途都只係出示咗張卡同Passport就幫你reset咗。雖然好快好有效率,但成件事真係好唔穩陣好兒嬉😅。

第三、 申請稅號 (Tax File Number,TFN)

可以選擇去稅局或者郵寄申請,但係最方便就梗係網上申請 (http://www.iar.ato.gov.au)。
逐步填返個人資料,最好就係有穩定嘅住址,postal address填返住址佢就會寄返稅號俾你,如果唔係俾郵局地址等佢寄去郵局再去拎都得,但係千祈唔好好似我咁大頭蝦唔記得咗填咗邊間🙄,行咗兩次都拎唔到,最後係經由電話途徑打去稅局confirm一大輪資料先拎得返個稅號🙈。正常大約一個月就會有。重有朋友提醒我地稅號就好似信用卡資料咁,唔可以隨便俾人,萬一僱主亂咁幫你報稅,蝕底嘅只有自己。