前篇...新加坡Part 2: 悠閒體驗

去新加坡之前,已經聽人講過話無咩景點,未去過嘅我地死都唔信😂。
去過之後就知唔係呃你,去完短期內未必會去第二次。

第二日: 牛車水 (Chinatown) --> 馬里安曼興都廟 (Sri Mariamman Temple) --> 聖安德烈教堂 (St. Andrew's Cathedral) --> 新加坡濱海灣花園 (Gardens by the bay) --> 魚尾獅公園 (Merlion)

牛車水(Chinatown)
牛車水美食街好出名,可能夜晚會比較熱鬧,我地去嗰陣日光日白,兜咗個圈無乜野行,都係賣啲頽頽嘅紀念品,好似香港嘅女人街咁。我地行咗陣就行咗入個似乎係熟食中心嘅地方。

見到哩幅壁畫就係熟食中心嘅入口啦。

早餐 (叻沙麵、餃子撈麵加咖啡)

早餐喺哩兩間買, 五十年代keep住有條quene喺度。

最鍾意喺啲咁地道嘅地方食野,又平又好食,而且食到最正宗最平民嘅野。叻沙有好香嘅椰奶味,撈麵都唔差。咖啡超香,我見佢應該係用煉奶沖,所以特別好飲。

食飽先有力繼續行,出咗門口行前幾步見到有間寺廟,係新加坡佛牙寺。入面金壁輝煌,但係要注意嘅係衣著都有限制,短褲或者太暴露唔入得,不過貼心嘅係佢可以借啲布俾你遮一遮。

佛牙寺

馬里安曼興都廟 (Sri Mariamman Temple)

下一站就係馬里安曼興都廟,我地只係隨便喺出面影咗幾張就算。因為入去要除鞋,而且影相係要收費。其實我都想入去行下,不過友人話唔行,咁就算啦😂。純粹到此一遊,其實出面建築
已經好有特色。

馬里安曼興都廟 (Sri Mariamman Temple)

聖安德烈教堂 (St. Andrew's Cathedral)
由牛車水搭返鐵去聖安德烈教堂都係一個站,喺City Hall落車一出就係。隨便拍拍就走了,唔知邊度係入口,又唔敢亂行,所以無入到。

聖安德烈教堂 (St. Andrew's Cathedral)

新加坡濱海灣花園(Gardens by the bay)
搭咗程巴士過去濱海灣花園。天氣超好,藍天白雲反映落去金沙牆外好靚,抬頭望上去好壯觀。窮遊嘅我地無入場,只係喺出面影影相,其實離遠影反而重靚,拍得到全部。

金沙酒店

新加坡濱海灣花園

穿過金沙沿路一路行一路行,唔經唔覺就行咗入去Marina Bay Sands,去food court補充體力再行過。其實已經有點攰,每次一坐低都可以坐好耐先行。況且喺新加坡,如果你有4日去玩,真係可以行下抖下,唔駛趕行程。

雞叻沙麵

喺哩度食野會普遍貴少少,不過都唔會太差, 我嗰個雞叻沙麵啲雞似係海南雞,個湯底都幾香,不過都唔夠朝早嗰碗咁香椰奶味。食完喺藝術館逛逛,入面大部分嘅展覽都係要俾錢入場,唔入場都可以試下間cafe,嘆杯咖啡,而且佢出面有一大片荷花池,我地去嘅時候適逢開晒花。

我地沿住橋行返過去最有名嘅景點--魚尾獅公園。中途遇到有個伯伯喺度賣夾心雪糕,未食過梗係要試下。

魚尾獅公園(Merlion)
慢慢行大約20分鐘就到魚尾獅公園,哩個景點係最多人,亦都係一個黎到新加坡幾標誌性嘅地方黎嘅。

魚尾獅公園

睇埋黃昏同夜景,搭返車去塭野食。肉骨茶上網做過功課,見最出名係松發、發起人同黃亞細。發起人同黃亞細都喺同一條街,而且比較近我地住宿嘅地方,所以先打算去黃亞細。喺花拉公園站(Farrer Park)已經係最近,行過去大慨10分鐘。其實當時我地已經行到好攰,10分鐘嘅路程對我地黎講已經有啲吃力。行到中途,到咗發起人,我地二話不說就入咗去。

發起人肉骨茶

滷水豬大腸

肉骨茶愈飲愈辣,但真係好正,用黎送飯真係唔覺唔覺就食晒一大碗飯。重要你一路食佢都會一路幫你加湯,鍾意嘅話可以飲幾碗。不過講真,個滷水豬大腸麻麻地。最後圓滿地咁結束咗哩一日😌。