[[墨爾本]] Grampians National Park 格蘭玶國家公園 - 奇珍異石與瀑布景觀聚集地

繼上次去完Brighton Beach同St Kilda Beach之後, 台灣男生又再帶我地去一個無車就去唔到嘅地方度玩 - Grampians National Park。

要去哩個國家公園, 由我地屋企出發揸車過去都要三個幾鐘。沿途一大片唔會喺城市見得到嘅草原, 耐唔耐就會見到啲羊呀馬呀喺草地上悠閒咁食下草, 曬下太陽。重會見到啲好似人咁大嘅乾草球, 有機會真係好想試下坐上去😆。

去到第一時間就係Book咗嗰度嘅倉庫屋。間屋真係一個大倉庫嘅外形 (話說我好似無影相, 所以唯有盡力形容下啦), 一入門口係喺中間位置, 就係一個開放式廚房,  床嘅位置大慨分為兩邊, 一邊係雙人床, 另一邊就係4張碌架床, 其實本身哩間屋係可以瞓到6個人。碌架床嗰邊最盡頭就係浴室。我同朋友就一齊瞓雙人床, 而台灣男生都好有風度咁瞓碌架床, 始終我地哩個組合要過夜的確係會有啲唔方便。 放低咗啲野, 就出發上山。

第一站我地先喺一個Balcony停低, 望出去一望無際嘅藍天同一大片高高低低嘅山同草地, 突然你會發現哩個世界係如此之大。

哩啲野係你唔離開香港唔會睇到嘅野。喺香港, 一生勞勞役役去工作只係為咗一個安樂窩, 我知, 有一個安樂窩梗係重要啦, 但係當你每日埋首工作終於買到自己嘅幾百呎小天地, 到時候你又會發現自己錯失咗哩個世界上幾多美好嘅野? 甚至乎, 到時候重有無咁嘅體力去睇哩個世界?

可能我喺哩一刻真係逃避緊現實, 但有幾多人真係有勇氣去逃避? 逃避一年之後, 將會係一個全新嘅我去面對哩個社會。哩啲咁難得嘅機會只得一次, 35歲之後你先想試? Sorry, it's too late.

突然感慨咗一下添。言歸正傳, 睇完哩個令人感嘆嘅景色, 下一站就係去 (好出名?) 嘅鱷魚石, 哩舊石個外形似足隻鱷魚擘大咗口。有啲人會坐喺佢個口或者頭度影相, 我只係坐喺佢個頭度影已經足以嚇死我, 睇到相就知佢下面係懸空, 只要稍為企唔穩跌落去, 一定粉身碎骨。重要喺我坐喺度嗰陣超大風, 完全唔知究竟係我個人俾風吹到搖定還是舊石喺度搖。媽呀, 真係好驚呀。行返入去我好似精神失常咁喺度發癲😂。

下一站到達 Mackenzie Falls, 國家公園入面一個瀑布。落到瀑布之前先要行一大段樓梯, 落去嗰陣唔算辛苦, 上返黎嗰陣就....嘿嘿。哩個瀑布都幾壯觀, 加埋彩虹真係無得輸😳。 

行完瀑布, 哩一日嘅行程都差唔多7788。返到落去嗰陣咁啱見到有袋鼠出沒!黎咗差唔多1個月, 終於見到袋鼠。佢地都幾怕人, 就算一路食緊野見你接近佢會一路跳開, 想摸下都唔俾😩。最後佢地都係俾另一班人嘅追趕之下嚇到走晒😒, 點解硬係有啲咁嘅人鍾意嚇走佢地先安樂。

完美嘅一日就咁完結, 要去Grampians National Park其實真係建議用2日時間去玩, 因為隨時一來一回都已經用咗半日時間, 同埋可以有機會試下住倉庫屋, 倉庫屋出面都有唔少袋鼠喺度行黎行去架。